iPhone 17 Air: Mini və Plus-un uğursuz yolunu təkrarlayır?

Yeni ad, köhnə problemlər.

İncə smartfonlar bu ilin ən böyük trendinə çevrilib. Əvvəl Oppo Find N5 gəldi – hazırda dünyanın ən incə qatlanan smartfonu hesab olunur. Amma bu titul tezliklə dəyişə bilər, çünki Honor daha da incə Magic V4 və ya V5 modelini təqdim etməyə hazırlaşır.

Samsung isə bu yay Galaxy Z Fold 7 modeli ilə hər kəsi geridə qoya bilər. Və bu sadəcə qatlanan telefonlara aid deyil. Samsung həm də ən incə modeli olan Galaxy S25 Edge-i təqdim etdi – cəmi 5.8 mm qalınlığında. Amma Apple daha da irəli gedə bilər: iPhone 17 Air ilə. Bu modelin qalınlığı cəmi 5.4 mm olacaq və Plus modelini əvəz edəcəyi gözlənilir.

Amma sual budur: Bu incəlik nəyin bahasına başa gələcək?

iPhone 17 Air – super incə, amma zəif batareya və kamera ilə

iPhone 17 Air-in bu qədər incə olması üçün Apple bəzi ciddi güzəştlərə gedib. Batareya və kamera əsas zərbə alan sahələrdir.

İncəlik səbəbindən böyük batareya yerləşdirmək çətin olacaq. Apple bu problemi iOS 19 və süni intellekt ilə həll etməyə çalışır. Apple Intelligence istifadəçinin davranışlarını analiz edərək enerjiyə qənaət edəcək – xüsusilə iPhone 17 Air üçün bu funksiya həyati əhəmiyyət daşıyacaq.

Kamera məsələsinə gəldikdə, yalnız bir 48 MP arxa kamera ilə gələcəyi bildirilir – eynilə iPhone 16e kimi. Əgər bu model Plus qiymətinə satılacaqsa, istifadəçiləri razı salmaq çətin olacaq.

Tarix təkrarlanır: Mini və Plus-un aqibəti Air-i də gözləyir

Apple son illərdə dörd model təqdim etməyə davam edir. iPhone 12 və 13 Mini modelləri sevilən, lakin satış baxımından uğursuz oldu. Daha sonra Plus modelləri gəldi, amma üç ildir ən zəif satılan iPhone olaraq qalır.

Niyə? Çünki Plus modeli sadəcə böyük ekran və bir az daha yaxşı batareya ilə gəlirdi. Əksər istifadəçilər isə 100 dollar artıq verib Pro alırdılar. İndi isə iPhone 17 Air bu uğursuz yolu davam etdirə bilər.

Air – gözəl, incə, amma hamı üçün deyil

iPhone 17 Air, yalnız dizayna və incəliyə üstünlük verən istifadəçilər üçün nəzərdə tutulub. Əgər sizin üçün batareya və kamera əsas deyil, sadəcə incə və böyük ekranlı cihaz istəyirsinizsə, Air sizin üçündür.

Amma digərləri üçün bu model mənasız görünə bilər. Az sayda istehsal olunacaq, geniş kütləyə çatmayacaq və ehtimal ki, satışlar uğursuz olacaq.

Əsl həll isə yeni batareya texnologiyasındadır – silisium-karbon batareyalar gəlmədikcə, bu cür incə telefonlar sadəcə zahiri görünüş uğruna edilən qurbanlar olacaq.

Texnologiyada trendlər sürətlə dəyişir. iPhone mini və Plus öz dövrünü yaşadı. Air də öz dövrünü yaşayıb, yeni modellərə yol verəcək.

Bəs sizcə növbəti “eksperimental” iPhone nə olacaq? Foldable deməyin – artıq köhnə xəbərdir. Gəlin ən yenilikçi fikirlərinizi paylaşın!